味千拉麵 (Closed)

未夠鐘接機，去味千食個tea先。叫左個豬軟骨拉麵同一杯可樂。上菜幾快，5分鐘就上到。湯底夠晒熱，但係偏鹹，而且無乜豬骨味。不過豬軟骨同拉麵都正正常常，但係普通質素，唔叫好食。事實上收得~$60呢個價，味千可以做好ｄ，普通日本料理店的拉麵都唔會只得芽菜同紫菜做配料咁孤寒，連粟米、日本魚蛋呢ｄ裝飾都懶得加……但我完全接受唔到個度既服務態度，好同意之前有網友話佢影衰香港形象！無錯個經理係安排入座方面安排得好快，而且跟上菜跟得好足，令你好快有得食，但係佢一味想催你走咁。一開始仲未決定好食乜時，佢已經會自動行過黎主動催你。如果你有ｄ咩事要叫佢，佢會好快應你，但個表情係同詛咒你無分別。佢地又會大大聲用廣東話係咁講「邊枱仲未走啊」之類黎施壓逼你快ｄ走（但當時唔係full），埋單時仲夠膽死係你面前講「ｄ人真係要逼先得」。做生意姐，唔駛咁趕客既，其實機場都有好多人聽得明廣東話架囉～