蓮香 (Closed)

想食蓮香點心，去旺角就輕鬆食到，唔使好似喺中環店咁，要撲出去搶點心。店員提醒，點心即叫即蒸，買飛後要等大約 15 分鐘。蝦餃、燒賣、叉燒酥同蓮蓉包之中，最喜歡蓮蓉包，餡多、軟熟，蓮蓉香滑唔太甜。今次係第二次嚟食蓮蓉包，蛋黃就唔夠上次咁靚喇。蝦餃係一口裝，每隻摺口有唔同，皮薄，蝦肉爽口，飯友認為餃皮唔夠中環店咁 Q，連燒賣都輸俾中環店。呢刻自己食的燒賣，咬落有肉汁，肉唔死實，並非肥膏多過肉。叉燒酥賣相確係麻麻，贏在多叉燒，調味佳，叉燒係睇得見的小片裝，略嫌入口唔鬆化，食落濕咗啲。鍾意點心夠晒熱，攞返埋位仲出緊煙，味道 OK，賣相做靚啲就更加好。香片茶包芬芳清香，甘味充滿口腔，非常討好。