天蓬 (Closed)

同啲內地同事去完長洲玩，送佢哋搭高鐵返內地之前。老細又唔想過海，咁就近近地醒起呢一間餐廳快快地食個early dinner。因為夜啲可能約朋友食飯，都諗住食得輕啲就無叫豬扒，同埋多數去啲新嘅快餐店都會食沙嗲牛肉。咁又好耐冇食過午餐肉，咁就嗌咗個類似常餐。上餐嘅時候，發現塊多士係厚底，早知佢係厚多士嘅話，一定烘底。如果佢再加埋少少蒜蓉喺面嘅話就正到不得了。不過依家咁樣齋包夾午餐肉食都好開心。但係個沙嗲牛肉就平凡咗少少，食完冇乜印象。配齋啡走甜都唔錯，冇苦澀味夠我充電。個煎蛋窿邊都好正，不過始終都係隔籬飯香，見到老細個西多士都好想試，不過都係嗰句夜晚可能食飯所以就留返下次啦，下次要試埋佢豬扒，可能要食豬扒先可以見到佢嘅真章。另外服務員都好好，差唔多收都俾我哋入，做埋個last order！