Cafe Paradise (杏花邨) (Closed)

今日呢去咗柴灣睇戲，因為果邊平同有大戲院，所以就去咗嗰邊睇。之後呢就要去搵食啦但係柴灣就冇嘢好食，所以就去咗杏花邨嗰度搵食。杏花新城嗰度呢就有好多餐廳，有中式西式日式快餐咩都有，我地就比間裝修好特別嘅Cafe Paradise 吸引咗入去。我地就坐咗去個好似灰姑娘坐嘅果架車度食，好有風味。佢係一間西式餐廳由前菜、小食、扒類、main course、pizza都有。本drink menu重好有心機咁一打開就有3D屋彈開黎。我地叫左個小食拼盤，卡邦尼意粉同雲呢拿沙冰。鋪入面座滿哂人，一家大細以至一個人鋸扒都有。等咗一陣，先黎個小食拼盤。四款雞翼，都各有特式，水牛城雞翼最開胃因為酸酸地少少辣。咖哩角都炸得好脆，如果有多啲餡就更好。炸芝士好creamy，唔講以為食緊炸豆腐，幾得意，幾好食。而薯角就炸到新鮮滾熱辣咁，好香脆，好好味。卡邦尼意粉個份量都幾多，個汁修到啱啱好，令到個粉好creamy，而且佢煮到好彈牙，都唔錯。杯沙冰好有雲呢拿味，唔太甜，好啲似飲奶昔咁，值得一試。間鋪都幾大，野食就算散叫都唔太貴，而且食物都幾好味，份量又唔少，所以都吸引到好多人食，遲咗黎都要有排等呀。