皇苑 (Closed)

東大街出左名多野食，而酒樓都有五六間，所以想係度立足都唔易。媽媽之前做酒樓，聽工友講呢度新開左間唔錯既酒樓，所以叫我地黎試下！到樓下，有個姐姐係度安排入座，再上二樓。酒樓唔係好大間，但食物種類都算多，有啲菜式第二啲酒樓晚市係無既，例如炸蟹鉗同拔絲骨等。首先，我地叫左個炸蟹鉗，呢個平時去飲先會食到，估唔到依家可以食新鮮熱辣，雖然好熱氣，不過一只半只算啦！好大只下，一碟六只，肉好爽口彈牙，有蟹肉，點埋醋食更好！花膠海參扣鵝掌料算多，如其名，有花膠、鵝掌、冬菇、菜同海參等。炆得幾林同幾入味，尤其是鵝掌同花膠。花膠好大舊，好林，一定好高骨膠原，岩晒女士食！正！豉汁蒸鱔，呢碟係我全晚最中意既！鱔係街市買唔平，呢度既份量都要70,80蚊到，依家一碟138所以價錢唔算貴。味道方面，有豉椒味，甜甜地，唔會好咸。魚肉爽口，有少少骨，但好幼、𡁻到，好味！仲叫左個菜膽杏汁豬肺湯，個湯幾白，好香杏汁味。湯渣有唔少，有雞腿、豬肺、豬肉、白菜等，唔怪得個湯甘濃啦。大家有機會要黎試一試！