名館 (希慎廣場) (Closed)

每月飯聚約咗朋友仔去希慎廣場食中菜。餐廳喺商場12/f，要喺商場2/f搭lift去。餐廳成晚都唔滿坐，裝修如同一般中菜館，坐得幾舒服，阿姐會主動斟熱水👍。餐廳主要賣酸菜魚， 用電爐加熱火辣辣上枱。除咗配料可自由選擇之外，主角都可以揀青江魚或江團魚。據阿姐解釋，青江魚比較滑，江團魚啖啖肉。結果揀咗青江魚，加豬紅做配料，都只係加$18一碟，一大堆好抵。另外叫咗一碟柚子蜜脆蝦球，賣相精緻討好，蝦球爽彈味鮮，炸脆咗個外殼，再加多到漏既甜甜柚子蜜👍，好味。炸魷魚鬚超級香脆，碟餸未放上枱面就聞到佢既香味，脆漿唔會好巉口，又唔會炸到好油，食完碟底唔會有一灘油。呢間店仲有得叫串燒，分別叫咗羊肉/羊腩/牛肉/雞腎，佢全部放一齊，仲要羊串/牛串外表一樣，問阿姐都分唔到呀🫠*三位朋友仔，食咗以上幾樣餸，埋單起身竟然唔飽，想去隔離舖食甜品😂