平成 (Closed)

今日去左尖東站附近食日本野。呢間餐廳有D似傳統日本家庭式小店，座位不多，牆上貼滿不同品牌日本酒既貼紙，加上木架上一枝枝既日本酒，真係有種以為自己去左日本既感覺。餐牌選擇不多，証明小店對食物品質有要求，確保食材新鮮。芥辣八爪魚凍豆腐：豆味香濃，非常滑溜，芥辣配上日本製醬汁，唔會有攻鼻既感覺，八爪魚爽口彈牙。鹽燒日本五花腩：串燒一定係居酒屋必點，五花腩油脂分佈平均，肉質Q彈，燒到黃金焦香，見到都流口水。味噌廣島蠔三重芝士蔥蛋餅：成份用鐵板上，熱辣辣，灑滿蔥花，切開既時候，仲有拉絲效果，而且蛋香味十足，廣島蠔味道鮮甜，大大隻，份量仲唔少。安格斯牛小排壽喜燒：個鍋係連埋個火爐一齊上既，鋪滿安格斯牛在最上面，賣相已經好吸引，壽喜燒配料好多，令成個汁好味到想加碗飯撈黎食。日本生啤而家仲做緊買一送一，梗係要飲番杯，不過因為今日要揸車，所以要一杯輕嚐一口吧。整體來說，小店對食物製作態度認真，每樣食物都會向我們介紹，水準亦都好高，下次經過一定會再嚟支持下。