壹食就醉

Open Now

Now Closed

一向食嘢唔戒口，就算病都繼續要食好嘢，甘啱病嘅時候正值下雨天，搞到冇心情係屋企煮飯，就出街食。朋友介紹位於尖沙咀鬧市中的一間小菜館，招牌裝修以紅色為主，一上到餐廳感覺置身於家中一樣，有住家飯食咁。餐牌多款選擇，除咗小菜之外，仲有得食懶人打邊爐。由於我哋有四人，就決定食小菜送白飯。椒鹽系列係我至愛，當然唔少得叫一份椒鹽鮮魷啦。魷魚嘅份量都頗多，而且面頭鋪滿炸蒜，旁邊仲有幾粒番茄仔做配襯。食落去椒鹽魷魚的外皮唔算太厚，反而好香脆可口，魷魚肉爽口彈牙，新鮮滋味。由於我哋四人太大食了，一共叫了七款小菜，竟然全部俾我哋食晒，當中包括椒絲腐乳通菜、薑蔥爆順德鯇魚腩、沙嗲金菇肥牛煲、薑蔥霸王雞、XO醬爆花枝片同埋黃金蝦。另外我哋仲有每人叫一碗白飯送小菜，我哋認真大食，最重要係每一款食物都非常新鮮，即叫即整，炒得好有鑊氣。