石一燒 (九龍城) (Closed)

今日同朋友去咗間係九龍城既和牛燒肉店，食物質素真係冇話講！我哋揀咗極上和牛盛會（$698），份量好多好夠食，同埋有好多款式嘅和牛試，真係食到舌尖上嘅享受😍😍首先嚟緊就係和牛盛會，個碟上擺滿滿嘅精選和牛，每塊肉都好鮮嫩多汁，肉質真係無得挑剔！九州A4和牛三角同埋上前腿肉都係我哋鐘意款式，三角肉厚切，油脂豐富，口感嫩滑，肉汁豐富。上前腿肉就更加嫩滑，入口即化，真係和牛嘅極致享受！澳洲和牛封門柳肉質鮮美，咬落去有嚼勁，肉味好香濃！前菜方面，有三款精緻嘅小菜，分別係甜酸辣三種口味有炸脆奶卷，蟹柳，同埋辣伴帶子裙邊，另外仲有一盤沙律，沙律清爽可口，好好味！樱花蝦味噌湯都好特別，湯底濃郁香醇，加上大量櫻花蝦係面，令人回味無窮。菇密會就係一盤各款鮮美菇類，燒烤後更加鮮甜，好適合搭配和牛享受！我地叫左一個飯同一個升級左烏冬！烏冬彈牙有嚼勁，湯頭鮮美，好解飽。甜品方面，有自己整抺茶加落雪糕到，完美嘅結尾！中間我地仲叫左杯啤酒，佢地宜家有個挑戰，如果女仔9秒飲哂就可以送多一杯，可惜我飲得太慢失敗左🤣🤣埋完單仲送左個刮刮卡，抽中左一枝紅酒可以下次用📍 石一燒 (九龍城) (九龍城)九龍城啟德道55號AVA5