德美壽司

Open Now

Now Closed

好多人，坐爆哂，好在訂咗枱。間餐廳比較細，但係櫈下面有個兜裝袋，好方便。叫咗5樣嘢，先嚟牛油果沙律🥑。牛油果粒多，沙律菜新鮮，撈入温泉蛋，少許蛋味，多咗一啲味覺層次，有特色，好好嘅開始。跟住三文魚茶漬飯，大大碗，飯團夠實，所以都算多飯，加上舖滿炸米，都幾飽肚。三文魚好似罐頭嗰啲，不過同啲湯飯一齊食，都唔錯。再嚟綠茶冷麵，伴有湯汁，蛋角碎，葱粒，蝦片碎同生鵪鶉蛋，好特別。撈埋一齊，主要淨係食得出蝦片味同湯味，一啲綠茶味都食唔到。😂之後有鹽燒鯖魚🐠。都好大條魚，燒得非常之好，從未食過咁嫩口嘅燒鯖魚，唔係硬掘掘嘅，最緊要係腥味勁少，一流呀。跟住重頭戲嚟喇，就係銀雪魚西京燒🐟。比我想像中大份，燒得肉嫩皮脆。唔多唔少嘅牛油味同糖嘅甜味，加上魚嘅油脂，實在係極品，仲有青瓜同薯蓉沙律配襯，簡直係性價比極高嘅菜式，下次一要再嚟食過。臨尾送甜品奶凍。奶味好濃，但係我唔係咁鍾意呢種奶味。奶凍彈性唔錯，如果係其他味就好啦。今晚全部啲份量都好足，食得好飽，但係唔算好貴，好滿足。