金鶴拉麵 (利民大廈)

Open Now

Now Closed

平日中環返工經過都冇食過今晚收工出旺角，見到終於坐低左。坐低之後，除咗陸續見到有啲食客入嚟之外，都見到有人等緊外賣。呢間店主打極濃白雞湯拉麵。個拉麵除咗有雞肉之外，仲有叉燒、做配料。但有點意外嘅係個炸牛蒡。好香脆、唔油膩！雞肉唔會癡牙、都幾嫩，然後重點係個湯。個湯一啲都唔鹹，杰身嘅程度啱啱好所以一啖接一啖，將骨膠原飲落肚！！女仕必選！另外仲嗌左個極濃龍蝦湯拉麵。因為係限定拉麵，所以揀左嚟試。佢個湯同雞白湯一樣好濃稠。調味適中，啲湯又係可以一啖接一啖飲。配料除咗有叉燒、蛋、紫菜之外，都仲可以加錢，會有龍蝦尾。食拉麵點可以唔講下個麵。雖然冇得揀軟硬度，但係個軟硬度非常之適中。我諗呢個亦都係點解冇得揀嘅原因，呢個軟硬度係最適合嘅。個麵亦都唔會好麵粉味，唔會搶咗個湯嘅味道。再嚟就係串燒。分別嗌咗牛舌同埋五花腩。真係好值得推介。牛舌相對貴少少，但佢肉質真係非常之好，好腍。咬落去有牛油香味。黑椒同鹽味，好香。五花腩調味同牛舌一樣。肥瘦適中，全晚最可惜嘅係冇加個啤酒。整體來講，性價比都幾高。下次收工經過，要入嚟食個串燒，飲個啤酒。