一君士多 (Closed)

今日特登過黎一君士多食野，因為記得之前古天樂黎幫佢影過張相做生招牌！仲聽講老闆成日都會留係鋪！乘機想見一見真人。好可惜嘅係今日老闆唔係鋪頭！無緣～唯有下次過黎再睇下撞唔撞到啦！講返正題先，一君士多裝修幾簡潔，感覺幾舒服！食物種類都算多，有車仔麵有飯有小食仲有甜品！今次我揀左牛頸脊米粉！有幾片牛係面，味道都ok！而我更鍾意小食芝士蘑菇雞翼同埋麻辣牛栢葉！掛住食雞翼都唔記得左影相！好香芝士味！咬落又香口，好好食！而麻辣牛栢葉原來係冷盤黎！真係有少少麻辣味！不過份量唔算多！可以過下口癮！最後仲叫左碟油菜，呢度淨係得蠔油生菜可以揀，食落幾爽口，冇淥過曬火，幾好唔錯！如果遲啲可以有多啲菜類揀就更好！樽仔奶茶都值得一讚，茶味幾香，細貓樽幾得意！跟麵餐加$20試下都幾抵飲！