榕記車仔麵 (Closed)

好想食車仔麵，呢度係將軍澳唯一一間出名，所以特登嚟試吓。地方幾乾淨，坐得都舒服，唔會好迫，服務員都有善，嗌咗麻辣燙底河粉配五樣餸，等咗一陣就嚟到囉！仲跟埋即棄餐具一齊來，唔怪之得枱上面冇筷子匙羹，覺得有點浪費唔環保吧，堂食都要用即棄餐具，其實如果處理妥當，重用餐具都冇乜問題，都可以好衛生。望落去碗車仔麵基本上就冇乜賣相，先講麻辣湯底，味道欠缺層次，得個辣字，冇乜鮮味，清淡咗啲，湯底係包芽菜韭菜，但係數埋都係得嗰兩三條，河粉可能本身好油，用對即棄木筷子好難先至將佢夾到上嚟，夾上來嘅時候仲有啲散，陳皮魚蛋幾特別，味道唔錯，不過冇正宗魚蛋嗰種嘅爽滑彈牙感覺，豬皮豬紅嘅份量都幾多，不過有啲濕濕碎碎，蘿蔔都幾甜，冇乜特別，反而豬大腸就幾入味，煮得都夠林。整體覺得都係唔夠傳統嘅風味，唔夠揦鮓，不過不失而已⋯⋯