北京王府水餃 (Moved) New Location

講起食餃子，我仍然好懷念六年前在北京一個隆冬嘅夜晚同一班朋友漏夜前往一間位於胡同內嘅食店食餃子。當晚氣溫只係零下十度，店內冇暖氣，凍到我地個個都瑟縮一團。冇耐店主就拎嚟一碗碗熱騰騰嘅餃子，嗰次係我一生人食嘅最好嘅餃子。一碗只係一蚊，之後就再食唔番。阿K成日話嚮擺花街附近有好多食肆，經濟抵食，其中一間就係王府。當晚我地嚟到已經接近十點，老闆見落雨冇乜人準備打烊。由於我地唔想阻住老闆收舖，所以我地只係嗌咗兩客菜肉餃。一客有十隻，皮厚厚的，就如當年我嚮北京食嘅餃子一樣。咬落去啲肉汁已經湧出嚟，好有肉嘅鮮味。點埋醬汁，唔駛一陣就成客餃子食個清光。一客大約三十蚊，好抵食。諗落食北方嘅餃子都係要嚮天寒地凍食至夠過癮，香港實在太濕、太熱喇。