早安越南 (Closed)

自從去完越南之後對於越南菜嘅要求都高咗，因為嗰邊嘅菜式真係做得好好食，價錢又平，好難得喺香港都搵到一間做得好食、正宗而價錢又唔貴嘅越南餐廳，呢間好值得推介！今次同朋友嚟食點咗越南嘅招牌菜式：生牛肉湯河同埋鮮蝦扎肉米紙卷... 另外仲叫咗兩個小食：分別係酸辣鳳爪同埋絲網海鮮春卷...我覺得佢嘅生牛肉河粉喺必食！佢嘅河粉似正宗越南河粉，好滑！湯底有好重嘅牛肉，濃得嚟帶帶點清甜。而生牛肉畀熱湯浸熟咗之後生熟嘅程度啱啱好，牛肉肥瘦比例恰當，冇乜肥膏但咬落口又會感受到牛脂平均分佈喺牛肉上面，好似日本和牛，非常高質嘅一個牛肉河，必食！另外佢嘅春卷同埋米紙卷都做得出色，好香口，裏邊嘅配料份量亦多，最特別係佢調配嘅醬汁，兩款都各有特色，而且好配合春卷嘅口味！至於越式鳳爪就屬於中上水平，幾爽口，而且酸辣嘅平衡做得唔錯 好適合夏天食，令人越食越開胃！本身都知道天后有好多出色嘅食肆，呢間必然係其中一間，下次會再來試佢其他嘅菜式！