グリル滿天星

Open Now

Now Closed

琴日咁啱清大假，個朋友話早排海港城開咗間過江龍專食蛋包飯嘅。見到條隊都有啲長，平日都要排隊，真係有啲想走。好彩RECEPTION 小姐態度OKAY 不時出嚟了解情況，最後排咗4個字左右就可以去。睇到個MENU 樣樣野都好吸引，叫咗個蒲燒鰻魚蛋包飯，同個梳乎厘PANCAKE同個朋友SHARE 嚟食。上菜速度都幾算快，同朋友傾咗一陣計，個鰻魚飯就上到。個飯要成二百幾蚊，但係當我見到鰻魚好大條，又好入味，
啲鰻魚汁唔會太咸，就覺得都值呢個價嘅。
飯係炒飯底，呢方面做得幾出色。唔會太乾身又唔會太濕。落單時，職員有提醒過梳乎厘PANCAKE需要時間製作。食完個飯時間就啱啱好到，梳乎厘份量好大份，好彩食甜品係第二個胃。梳乎厘入口有蛋香味，口感棉棉整體嚟講都唔錯，雖然價錢有啲啲貴，不過食物質素都算係水準之上，
我諗間中獎勵下自己都食得過嘅。