Green Orange

呢晚出咗去上環做嘢，之後順便約喺附近返工嘅朋友仔食飯，記得之前食過唔錯，所以決定再幫襯! 睇緊餐牌嘅時候，店員主動介紹同推介一啲食品，我哋聽完都覺得唔錯，所以就落咗單。然後就嚟咗熱熱嘅餐飽，食落微甜鬆軟，有淡淡麥香，點埋橄欖油同黑醋，又係另一種滋味。首先上菜嘅係燒帶子柚子沙律，帶子表面煎得香口，裡面肉質鮮嫩，火侯控制得好好，柚子又甜又多汁，帶微酸，再配埋沙律菜，好清新嘅感覺! 再來就係蟹肉南瓜忌廉湯，南瓜味香甜，質地好幼滑，啖啖蟹肉攪埋啲濃湯，真係好夾好好飲! 之後就上香煎鵝肝伴黑松露意大利飯，鵝肝充滿油香，煎得好香脆，配埋有黑松露香嘅 creamy 意大利飯，雖然邪惡，但食咗先至算，好正呀! 另一個主菜叫咗醬燒美國豬仔骨，店員介紹佢哋用嘅係比較多肉嗰款豬仔骨，切開一睇，真係唔同出面食到嗰啲，真係好厚肉，啲肉食落又淋又滑，有肉味，唔錯! 食完正餐，就到甜品時間，叫咗個朱古力布朗尼伴雲呢拿雪糕，布朗尼最怕焗到乾爭爭，呢到食到嘅仲保持到濕軟嘅感覺，朱古力味香濃，配埋冰凍嘅雲呢拿雪糕，一冷一熱，為呢餐畫上完美句號。