元帥麵館

Open Now

Now Closed

星期一午飯時間，一入去就有位。點咗一碗豬骨湯豬扒米線、一碗蕃茄湯封煎黃花魚幼麵、一杯熱檸水。等候時間唔算長。兩款湯都夠哂濃，厚身嘅，落足材料。蕃茄湯蕃茄味十足，加咗啲香料，令湯更有層次，有幾嚿蕃茄，好味。幼麵爽彈，吸咗湯味，我鍾意。豬扒大大塊，表面有啲油，但係炸得比較乾，咬落去表面有啲硬，整體還可以。我本身唔鍾意食魚皮，開頭淨係食魚肉，有啲腥，要同湯、元茜或者葱一齊食先得。但係因為炸咗嘅魚皮好難夾開，於是中途開始連皮食，先發現魚皮炸到好脆好香口，連皮食魚肉就唔腥，呢個先至係正確食封煎魚嘅食法。食到淨翻魚頭，平時我唔食魚頭嘅，但係最後都係睇下佢炸成點。魚頭都係炸得酥脆，頭骨都可以食，油脂香十足，勁好味。兩款麵，一碗一流，一碗掙啲，响呢間嘢度食，可能要揀啱嘢食先得。侍應都算有禮貌。餐廳油煙味唔大，但係我嘅口罩都吸咗少少油煙味。