杉玉 (沙田中心)

Open Now

Now Closed

喺沙田唔知有乜好食，行行下黎咗嚟沙田中心，醒起有段時間冇食過杉玉。雖然都多人排隊，但都決定等下，大約等咗20分鐘左右。壽司當中鮟鱇魚肝壽司、三文魚親子腐皮壽司同炙燒昆布漬鰈魚鰭邊壽司係必食。鮟鱇魚肝有輕輕燒過，好香，入口有好滑嘅肝口感。三文魚親子腐皮面頭放滿咗三文魚子同三文魚碎，超飽滿。炙燒昆布漬鰈魚鰭邊炙燒完啲魚油出晒黎，而且佢好大塊，好正。櫻花蝦卡邦尼風烏冬又係每次都會叫嘅烏冬，烏冬質地煙韌，好掛到卡邦尼汁，今次有埋小小櫻花蝦，好香口。日式高湯玉子燒拌蘿蔔蓉呢個又係好有驚喜(第一次叫)，有6大舊玉子燒，好熱好滑，蛋好重高湯味，一定要連埋面頭嘅蘿蔔蓉一齊食。韓式辣醬醃鰈魚鰭邊，三文魚子拌蘿蔔蓉同時叫咗呢兩個小碟，鰈魚鰭邊有啲似左口魚但爽爽地，呢個辣醬真係偏辣，所以我就夾埋三文魚子蘿蔔蓉一齊食，味道竟然好夾，蘿蔔蓉可以中和到個辣味。三文魚子拌蘿蔔蓉雖然個底都有啲醬油，但就咁食有啲dry，所以要配落其他野到一齊食。雖然係壽司郎嘅居酒屋，有啲嘢係壽司郎都食到，但感覺上呢度啲壽司比壽司郎精美同大舊，另外仲有得自選壽司組合，除翻開都抵食。同埋環境坐得舒服啲，亦冇咁嘈，所以久唔久都會食下佢。