M3 Italian (Closed)

河畔花園有唔少餐廳，食意大利西餐嘅就好似只有呢一間m3。之前試過大圍嗰間分店，覺得幾好食，今次就食河畔呢一間。喺平日嘅晚上嚟到，好好彩有位。餐廳嘅環境寧靜，有少少暗淡嘅燈光，增加咗浪漫嘅氣氛，都幾啱情侶拍拖食飯傾計。我同朋友點咗二人套餐，五百蚊再加一。套餐包兩碗餐湯、一個前菜小食、兩個主菜同埋兩個甜品。1) 凱撒沙律 (⭐⭐⭐⭐⭐):賣相十分唔錯，啲麵包粒大大舊，好有口咁。我哋揀咗配三文魚，三文魚嘅鮮味同沙律嘅醬汁融為一體。2) 烤美國安格斯肉眼扒 (⭐⭐⭐⭐⭐):肉眼扒五成熟，好大塊肉質鮮嫩，又唔會有好多肥膩嘅部分，幾好食。個人認為咁多款主菜，入面揀呢個比較抵食。3) 野菌意大利飯 (⭐⭐⭐⭐⭐):意大利飯配有野菇，用烤嘅形式煮成，非常入味。另外有黑松露嘅成分，增添咗意大利飯香味。最後甜品揀咗雪糕球，當晚係雲呢拿味道雪糕球，有兩嚿，可以同朋友share。整體嚟講，餐廳嘅味道唔錯。一個二人套餐，就可以組成一個豐富嘅晚餐。