正九清湯腩 (常安樓)

Open Now

Now Closed

星期日出咗旺角探望啱啱從外國回港嘅朋友。因為防疫措施需要3+0 ，未可以堂食，於是買埋個外賣俾朋友仔。我自己都未食晏，順便得嚟又專登去咗呢間「正九清湯腩」專門店。之前見吾少人介紹不錯，今日終於有機會試下。呢間分店位於油麻地文明里，十分近地鐵站出口，位置算是好方便。餐廳約有三十座位，星期日五點多六，約八九成坐滿，都算幾繁忙。清湯腩$49，可加$8 升級為坑腩、崩沙腩或爽腩，餐牌仲寫明可以落單時指明想要肥或瘦，定半肥瘦都得，悉隨尊便呢個真心不錯。除左河粉麵，亦有飯供應。我鍾意食河粉，於是叫咗碗《崩沙腩河》（$57）。河粉外賣無論幾近都好，都一定要分湯上，否則返去的河粉會太淋。我要咗多蔥。打開碗河粉，蔥真係多到睇唔到的崩沙腩，加入清湯之後，稍稍撥開蔥花，目測份量十足，的腩足足蓋滿面，大概有9片。片片靚仔，試咗片牛，入口軟硬適中、肉嫰吾柴，帶有少少脂肪更香，收貨。《腐乳通菜〉（$19），正常水準。跟餐加$8加杯凍檸茶。埋單唔使$100。整體來講不錯，唯一要挑剔嘅就係辣椒油一般。下次可以再試埋牛三寶、爽腩、坑腩等等。