泰國小吃 (Closed)

一場黎到西貢行下，係碼頭睇下人釣魚，影鳥類，呢D秋涼天氣舒服到不得了，行下行下又到晚飯時間，係小街中搵到呢間泰國菜店 多款泰式湯粉類，但今晚想食飯，叫左客泰式海南鷄飯 (跟冬瓜湯)，份量對眼 海南鷄已起晒骨，只係隻肶仔有骨，入口幾滑溜，點配特色醬汁，酸中帶微辣; 另外個油飯亦都帶口感，單食都可以! 呢碟麵醬炒通菜，炒得幾惹味，本應係甜甜地，但加入左辣椒一齊炒，食食下又食到D辣味，但係係可接受嘅，通菜入口無渣! 最遲黎度嘅係呢碟青木瓜沙律，賣相似樣，青木瓜絲夠口感，配埋蝦米，豆角，花生碎增加香口感，千祈咪睇少D辣椒，愈食愈辣，尤其係食到底部有汁部份，頂唔順食剩1/3! 如果唔係咁辣嘅，味道係幾唔錯嘅! 價錢親民，係門口等位嘅食客都唔少!