楊記麵家 (Closed)

我平時好少在出面街食蝦子麵，因為細個食得太多，但當然偶然一次又無乜所謂，路過有米芝蓮推介過嘅楊記麵家...好！決定來一碗！雖有名牌效應支持，但價錢方面仍然係平民化，圖中所見嘅蝦子鵝腸撈麵都係三十蚊，見到果啲多到嚇親人嘅蝦子，呢個價錢絕對抵食。蝦子咸香味十足，食果陣唔駛再加其他醬油再調味已經好正，夾埋蔥花食絕對一流！鵝腸比例上都幾多，雖然呢啲鵝腸已經將肥膏切走，但食落去感覺仍然覺得好肥大，咬落亦都非常爽口。如果唔中意食鵝腸嘅朋友，仲有鮮牛肉或者土魷兩種餸可以選擇...跟撈麵一齊黎嘅呢個大地魚湯，第一啖入口其實覺得都幾咸下，但細味之下又唔會覺得係令人人飲到好口乾果種，箇中原因就係因為入面加左羅漢果去煲。呢個湯愈飲愈好味，飲飲下都唔想用黎撈麵，就咁清左佢就算～哈哈！楊記同中環出名嘅沾仔記雖然同為姊妹店，亦用上同一種湯底，但麵身方面風格迴異。呢度麵質相比下好幼細，咬落去夠彈牙煙韌,，而且亦無鹼水味。相反沾仔記果度鹼水味較重，麵身亦偏硬，所以明顯唔係「賣飛佛」。