奏海鮮火鍋 (Closed)

最近日日都去打邊爐，依日就同同學去左尖沙嘴試新野。一上到去都幾好氣氛，闊落，乾淨，都有個大魚缸係度養任啲海鮮。菜單有兩版，單係湯底都有十幾樣，樣式都好唔同。我地就揀左胡椒雜菌花甲鮮雞鍋，再揀左幾樣活海鮮同火鍋料。未上火鍋之前就比左調味料你先，計計埋都有九種唔同既材料比你落，都算好新鮮，又多選擇，我落左好多蒜同蔥花嗌左個洛神花茶，酸酸甜甜好醒神又清涼之後就上左個象拔蚌刺身，一斤六兩，鮮甜爽口。之後就食打邊爐啦，嗌左腐竹、墨魚滑、蝦滑、手切黃牛、菇拼盤、粟米、豆卜等等配料。墨魚滑同蝦滑打得勁黏，單係勺出黎已經感覺到唔同，大大塊放入去滾，好彈牙又好有味，好抵食。黃牛鮮甜，淥得耐都冇好老既問題，粟米好好食，勁甜又爽口。雞件醃得入味，夠滑。手工豆卜同平時食既唔一樣，一層層腐皮，炸得好香，推介。最中意食菇<3最後仲有果盤送，貼心。海鮮新鮮好食，食材水準以上，個湯底本身已經好甜，越滾越有味。服務好，不過真係要返啲銀兩先食到。