海南雞專門店

Open Now

Now Closed

海南雞專門店係太安樓其中一間人氣店，每次嚟到門外總係排咗一條人龍。見到人哋碗海南雞飯好似唔錯，饞嘴嘅心又被挑起咗。呢次我哋買咗海南雞飯同海南雞髀飯，分別在於雞髀比較多肉，就咁睇好似最少多接近一半。雞肉已經去骨，啖啖肉食得更加方便。肉質稍薄唔厚冇肥膏，食落皮脆肉嫩滑，口感滿意。油飯粒粒分明，配上薑蓉、甜豉油同辣醬一齊食就仲濃郁惹味，當中仲有少少切條青瓜。隨雞飯仲有杯冬瓜湯，入面有唔少冬瓜肉，食完雞飯之後飲都幾消滯。雞飯嘅表現好出色又唔算，份量對女仔嚟講適中，男仔單食一份就可能偏少，不過以廿幾至三十幾蚊嚟講水準合格有餘，加上流量大，食物幾乎係啱啱煮好就賣，除非本質太差，如果唔係要唔好食都難。