海皇粥店 (西菁街) (Closed)

住係元朗幾年，海皇都搬左三次舖，又嘉誠搬去千式，而加又搬左黎喜尚喜隔離。有時想食下粥都會諗起佢，呢幾日天氣咁凍，食粥就啱晒啦。新舖位置～好似啱啱開係呢度？上星期行過都唔覺眼。牆邊位滿座，咁就坐圓枱啦，一個人霸張圓枱有啲唔好意思。枱上有調味品，枱邊櫃桶內有餐具，自助好方便。點了西洋菜雙拼丸粥配油條半客，再加了熱豆漿（$47）。個碗都幾深，丸有六粒，西洋菜下得也多，份量足。雙丸中其中一款係鯪魚球，幾爽口無腥味。另一款似係豬肉丸，不確定，哈哈，食落較“粉”。粥底鹹香，食到尾都無出水，整體感覺不錯。都已經係晚上九點多，油器不可能係新鮮吧，無淋無漏氣就收貨了，浸係粥入面都唔知幾好味，食粥一定要有油炸鬼～食完粥仲口痕，多點了一客牛肉腸（$23）。即叫即拉的，腸粉軟腍超多牛肉，最正係多芫荽，加埋甜豉油就係好味。熱豆漿不太熱，但豆味濃又不甜，幾好飲。晚上九點半來到，見佢寫住收十點，以為會趕客，點知又唔係喎，大把客遲過我入黎都可以堂食，最誇張係有一枱九點五十分入到黎，叫左粥，炒麵同腸粉，十點邊趕得切呀，聽啲員工傾偈講話又要加班了，哈哈，不如改收晏啲啦。