享丼丼 (Closed)

聽到呢間餐廳個名咁響當當，喺門口睇完餐牌覺得幾啱食，就入去試下。餐廳主要以卡位為主，坐得好舒適。隨即叫番幾杯野飲，鹹檸檬雪碧係我至愛，可以爽一爽喉嚨。朋友都叫咗一杯好濃郁嘅朱古力暖一暖個胃。除咗厚厚嘅餐牌之外，仲有啲特別優惠餐牌，最優惠嘅係凡惠顧套餐或定食滿$80以上，就可以加$1換購刺身或者壽司，好抵食呀！我哋都唔執輸，+$1 要甜蝦刺身。甜蝦都好大隻，口感爽口彈牙，新鮮美味。女士們最鍾意食豆腐，可以養顏，隨即叫咗一份芝麻醬冷豆腐，芝麻醬鋪滿晒喺豆腐面頭，食落去質感好滑溜。仲有韓風炸雞翼，雞翼好大隻，食落去外皮香脆，入面嘅雞肉肉質鮮嫩。另外日本山葵醬炸蝦都同樣滋味。除此之外仲叫咗啲壽司，包括火炙三文魚、鰻魚同埋我最鍾意嘅火炙左口魚邊壽司，食落去簡直有入口即溶嘅口感。重頭戲一板海膽，海膽呈現鮮橙黃色，食落去全部都係鮮甜無比，根本唔需要點豉油Wasabi，已經好好食了。