肥高美食 (Closed)

好耐無寫下食評，今日出番手先﹗自從去完土耳其後，都專心在寫遊記，如果對土耳其有興趣可以去我blog睇睇﹗呢段都要計到去1/7大遊行，話說當日廿幾萬人上街，我同食家由3:00pm行到9:00pm先上到去政府總部﹗行完身水身汗，搭番船過海，試一試呢間﹗肥高美食，地點在廟街佐敦頭，牌坊下面﹗好幾年前行廟街其實曾經經過，不過見佢門口都係外國人遊客，以為係呃遊客食店，所以無咩留意﹗有室內位，亦有幾張枱係坐街的，大部份外國人來架﹗前面一枱仲有美麗的國內朋友﹗(係咪即刻好想來呢..... )遊行完身水身汗，梗係飲啤酒啦﹗來兩支哈爾濱先﹗呢間食店用戰鬥碗架，每次見到都好懷念那年那月的尖咀妹記﹗是來個豉椒炒蟶子先﹗好多汁喎﹗蟶子好大隻，$98有四條，我地一人兩條﹗以為個汁極濃會搶哂蟶子鮮味，點知完全不是，汁味岩岩好﹗蟶子亦好新鮮彈牙﹗吃得出鮮甜呢﹗好味道﹗再來的是避風塘中蝦，見對面幾枱都點呢個菜，我又試下﹗蝦是海中蝦，夠大隻，啖啖肉，吃下雖是冰鮮貨，但配上大量蒜泥辣椒香蔥同炒，惹味﹗肉質夠爽勁﹗天氣太熱了，胃口不是很好，隊啤為主，兩個人隊左六支啤，最後來多個奶油津白夠哂皮﹗埋單三個餸加六支啤酒，$300