老闆火鍋冰室

Open Now

Now Closed

早幾日我哋去咗元朗呢間舖度打邊爐，舖頭裝修好懷舊，有霓虹燈牌、牆身係地磚樣式。位置都好闊落下，幾好坐。我哋叫咗佢招牌沙嗲湯底同埋蕃茄湯，沙嗲湯底冇我哋想像中咁鹹，反而帶有一啲香料味，味道唔錯。邊爐食材包括一大碟海鮮，入邊有蝦、鮑魚、沙白，仲竟然有鱔！係平時啲舖頭都好少見會有鱔，原來都幾啱打邊爐，食落彈牙。啲海鮮都好新鮮，睇吓呢隻游水蝦就知咩料啦！而配料都好豐富，除咗海鮮之外都可以任嗌。牛柏葉超級大嚿，重到夾唔起。仲有唔同款牛肉，各種蔬菜，配料例如鵝腸、鴨血、各類丸等成50至60款配料，啱晒乜都想試吓又眼闊肚窄嘅我哋，食到我哋勁飽。見到隔籬枱喺度食雞煲，聞到好香，又見佢哋可以加雞，下次嚟都要試下。