日出茶太 (Closed)

食完咁惹味嘅串燒後, 師傅覺得絕對有必要飲番杯野, 但飲咩好呢? 見隔離有兩間台式飲品店, 一間師傅之前試過, 一間就未試過, 諗左陣決定揀間試過嘅, 皆因想穩陣少少少!行到埋去就睇下有咩好飲啦, 最後師傅柯打左冷山青茶! 冷山青茶制作需時,相比一般珍珠奶茶嘅時間較耐, 幸好師傅唔係因為食得太辣而需要飲品救命, 否則都會幾大鑊!其實師傅都幾怕喺街邊食野要影相, 但係有相片始終較為有真實感同說服力, 所以師傅亦要為呢杯飲留倩影! 冷山青茶師傅講左少甜少冰, 所以攞住杯野時其實冇冰, 搖勻後即飲, 入口發覺雖然冇冰, 但亦十分清涼, 加強茶味香濃, 濃中帶澀, 反而唔覺有咩甜味, 真係好似一杯青茶, 感覺十分舒服, 如果怕澀嘅第一啖會可能有少少抗拒, 但飲多幾啖後亦應該能夠接受, 皆因飲完之後清爽涼快, 解渴一流!總括黎講冷山青茶質素頗佳, 價錢相宜, 十蚊一杯! 大熱天時下飲絕對係消暑解渴, 十分過癮; 笑臉係值得一比, 有機會都會再試下其他款式!