食口福茶餐廳 (Closed)

今日去咗有好多元朗人喺facebook推介嘅茶餐廳《食口福》食午餐。係食之前都滿心期待，因為餐牌上面 參考圖嗰啲米線個樣幾正。叫咗個【四川麻辣米線中辣】$29 加【豬膶】$7同埋【麻辣手撕雞】$7。 同阿姐落完單之後，佢先同我哋講話要等成十分鐘去煮米線，真搞笑點解唔係嗌之前就warn定我哋呢? 初時真係畀碗米線外表呃咗，米線個樣幾似樣，麻辣湯底重混有一啲豬潤嘅肉汁。不過一夾起米線就知出事，諗等十分鐘啲米線應該即叫即煮，點知啲米線煮到過曬火，唔煮嗰十分鐘應該冇咁嬲。米線煮到變成半透明，口感有如漿糊一樣糊口、淋pat pat，連我鍾意食淋麵嘅都頂唔順。同埋麻辣湯底中辣就略嫌唔夠惹味，湯底都幾淡，而且麻香亦唔夠，都算係失敗之作。唯一嘅好處就係冇乜加味精，就當食得健康啲。至於豬潤就爽口得嚟帶粉， 薑味濃，唔錯。 麻辣手撕雞亦算好味， 麻香突出， 雞肉嫩滑， 可惜分量唔多，食落唔夠喉。整體感覺，呢間茶餐廳真係「名過於實」， 而且衛生情況亦麻麻，食完嘅餐具同埋菜渣就放喺食客嘅餐枱隔離， 實在有啲嘔心。