616牛肉火鍋專門店 (積富街)

Open Now

Now Closed

覺得牛呢種食材好神奇，明明都係牛，唔同部位都有唔同味道。適逢天氣轉涼，想食牛又想打邊爐，所以去咗試試616嘅打邊爐。以火鍋店黎講裝修非常靚同有香港特色，有好多唔同嘅裝飾。好得意嘅墊枱紙，推介牛部位，同埋教客人唔同嘅牛部位要淥幾耐先好食。飲品叫咗三款，最鐘意玫瑰洛神花茶，完全唔酸，加咗蜜糖好味道。覺得呢款橙味汽水比大牌子嘅好飲。飲咗半支嘅菊花桂圓露，幾清新幾甜。主角湯底係鴛鴦沙牛，一邊清淡一邊濃郁。左邊清湯入面有芹菜芫茜同蘿蔔牛展，配牛肉食唔會喧賓奪主；沙嗲湯底配響鈴、公仔麵，索完湯一齊食無得彈。每碟望落去都非常靚。右二嘅係蘇格蘭雪花胸肋，係我全餐最鍾意嘅牛，油脂分布平均，牛香十足。包住豬肉涵嘅蛋餃，非常特別。牛駝峰一樣牛香十足。牛橫隔膜我比較少食，相對其他部分冇咁油，肉質口感好好。難得見到有賣牛骨髓嘅鋪頭，當然都要試吓。唔腥呢點相當抵讚，配沙嗲湯好好食。加點一份雙層肉，可能近牛肚腩，好多油脂，相對前幾款牛肉係食肉香，佢就傾向食油脂嘅香味。整體而言非常滿意，食物非常美味，感覺到絕對唔係交行貨。環境又乾淨，地板冇預期中嘅痴笠笠。雖然價錢貴少少，但真係值得。