粉制良品

Open Now

Now Closed

今次去到深水埗，唔入餐廳搵嘢食，捐窿捐罅搵到一間用筲箕嚟蒸河粉嘅小店（蒸櫃桶腸粉/手製瀨粉就聽過🤣）。估唔到小店人流不絕，好多附近街坊都會立食/買外賣返屋企食，絕對係性價比一流！🌟手撕雞筲箕河粉蒸河粉嘅筲箕痕跡輕而易見，河粉比較實色唔透光，證明落足料既米(用咗陳年梯米)嚟磨米漿，唔點溝粉，質感比平時蒸腸粉更幼滑。但又冇平時食既河粉咁彈牙，感覺上冇平時食嘅河粉咁油膩，更健康。每份河粉都會灑上花生碎🥜同菜脯粒，口感同味道都豐富👅。手撕雞🐔份量不少，落咗少少芝麻醬調味，再加埋青瓜絲十分匹配。記住一定要落埋秘製醬油，唔太鹹又有香濃嘅乾蔥同蒜味。🌟牛三寶筲箕河粉牛三寶就有齊牛腩、牛筋同牛肚。牛腩細細舊，帶有少少筋膜又唔會太韌。牛筋都炆得幾腍，有少少黏口。牛肚就唔算炆得好腍，有啲咬口。🌟火鴨絲碗仔翅呢度嘅碗仔翅有齊基本嘅冬菇絲同木耳絲，加上火鴨絲，三款配料都切得比較粗身有咬口。調味適中，唔會太杰身。