鐵板世家

Open Now

Now Closed

放工去左金魚街買魚糧，順便食埋晚飯。呢度都有好幾間港式茶餐廳，門口見到呢間茶餐廳食鐵板扒，都好耐無食過，咁就食番餐先。餐廳光猛，走懷舊港式風格，環境乾淨整齊。餐牌有港式鐵板餐同焗飯，而鐵板餐包左餐包、餐湯跟薯菜，百令蚊抵食又豐富，咁我哋就叫左兩份。餐包：翻熱左暖笠笠，好軟，搽牛油溶左食就OK。餐湯：羅送湯好足料，好多蔬菜，甜甜酸酸，夠開胃。忌廉湯濃結適中，又唔會太淡，夠晒味道。鐵板西冷牛扒：賣相唔錯，跟餐牌相一樣。叫左五成熟，切開仲紅紅地，唔會過熟，剛剛好。牛扒質感軟熟，唔韌無筋，配左黑椒料幾好食。意粉：食薯菜唔夠飽唔緊要，另加$10就有大大碟飯或意粉。鐵板肉眼牛扒：肉眼扒大大塊，同樣叫左五成熟。肉眼同西冷質感差不多，肉眼就比較瘦D。薯條份量都幾多架，仲要係粗身薯條，我就覺得牛扒跟薯菜已經好飽好飽。甜品：啫喱係免費贈送，裡面仲加左雜果，無咁單調，唔太甜，剛剛好。飲品：叫左凍檸茶同凍朱古力，兩杯都夠味正常。