萬豚屋

Open Now

Now Closed

喺尖沙咀做完野黎到萬豚屋食午餐，兩個人叫左一個小食、兩個烏冬同埋一件蛋糕。墨魚炸彈係墨魚滑包住溏心蛋一齊炸，墨魚滑彈牙、溏心蛋流心度十足，加埋類似明太子嘅醬汁，口感味道都唔錯，一定要趁熱食。香菌濃湯上級牛肉手打烏冬，湯底非常濃郁，睇到有至少兩種唔同嘅菇菌，面頭仲加左一匙有少少似黑松露又有少少似菇菌味嘅醬，令味道更豐富，烏冬好好咬，間中又可以食下豆苗清清味蕾，牛肉有牛味唔會過肥。友人被「美味！抗衰老！」吸引，叫左餐廳特別推介大阪風石燒金胡麻擔擔烏冬，湯底用嘅「大阪和田萬」黃金胡麻店內都有得賣，每檯都放左一個吉樽做sample。友人形容胡麻味道簡單直接唔會太滯太漏，加左擔擔麵嘅肉醬香濃惹味，帶微辣，豚肉油香豐盈。福岡柚子豆乳芝士蛋糕有驚喜，估唔到手打烏冬店竟然有咁出色嘅甜品。柚子味重，感覺清新，好岩炎熱嘅夏天食，面頭灑上紫薯粉，有心思。胡麻烏冬同蛋糕本身都有跟餐飲品，我叫嘅凍檸茶正正常常，友人加錢要左活乳酸爆珠特飲，係乳酸飲品加乳酸味爆爆珠，鐘意calpis嘅佢話大滿足呀。店內嘅牆壁都畫滿左唔同嘅豬公仔，好可愛。店內冷氣夠凍，大熱天時食熱騰騰嘅烏冬都唔會滿頭大汗。