雲長小龍坎老火鍋 (Closed)

這晚去到尖沙咀君怡酒店內的中高檔火鍋雲長小龍坎老火鍋吃晚飯。由於餐廳位處酒店內，都坐得幾舒適，侍應亦都好友善，會同我地吹下水。餐廳提供嘅主要湯底包括麻辣、芫荽皮蛋、藥膳、蕃茄，我哋揀咗麻辣茄蕃茄鴛鴦鍋。湯底嘅味道都唔錯，麻辣嘅湯底係小辣，對於我來講辣度適中，蕃茄湯底味道鮮甜，又帶點酸，幾開胃。火鍋配料嘅選擇都唔少，而且每款嘅味道都唔錯又新鮮，價錢屬於中高檔，所以配料嘅質素都唔差。佢哋嘅蝦滑非常非常彈牙，韭菜餃亦非常好味，穀飼黑豚肉肥瘦適中，鴨血勁好食，功夫土豆片勁薄，係火鍋最佳拍擋，即炸魚皮新鮮即炸勁脆，薯粉爽滑彈牙。在Facebook打完卡仲有豆沙鍋餅或紅糖糍粑餸，份量好多，味道唔錯。另外加$99就可以買到一人份海鮮拼盤，有大大隻爽口大蝦、活鮑魚（上枱後仲識郁㗎 ！ ），同埋有幾個貝殼類，每一隻都大大隻，冇沙，好新鮮。兩個人食以上咁多野都食到非常飽，賣單八百幾蚊，價錢已包加一和醬油茶錢。