媽咪隨意屋 (Closed)

今日同朋友嚟到長沙灣呢邊行街， 順便食埋晚飯 ，好近站嘅元州商場，入面有好多選擇，最後決定咗食媽咪隨意屋， 因為畀佢嘅餐廳設計吸引咗！設計好靚，坐得好舒服， 又闊落，好寫意！我點咗一個泰式金邊粉，賣相好靚，紅紅橙橙，綠綠地嘅裝飾，成個感覺好fresh， 有三隻大蝦球同埋豆腐 ，仲有少少花生碎同埋青檸 ，可以加青檸汁落去金邊粉，增加多少少酸味 ，更加好味 ！金邊粉味道啱啱好， 口感柔軟 ，大蝦都好新鮮， 花生碎又脆 ，相當唔錯！仲點咗個一口椒鹽豆腐， 全部都大大粒一碟滿， 炸得金黃色，好靚！一口咬落去脆卜卜嘅表皮包住軟滑嘅豆腐，仲有淡淡嘅鹽味！ 覺得唔夠味可以自己去加各式嘅調味粉！其實佢有好多唔同口味嘅粉， 有中式孜然粉 ，濃味芝士粉 ，惹味香辣粉， 日式海苔粉，同埋船麵專用嘅辣粉， 每一種都好吸引！ 可以加入去椒鹽豆腐度！最鍾意嘅係濃味芝士粉， 同椒鹽豆腐好夾！