有囍 (Closed)

剛剛從一些好凍嘅地方返香港，就急不及待想食一啲熱辣辣嘅嘢。朋友就提議我哋去食羊腩煲， 我即刻話好。咁今晚就去咗太子花園街一間叫做有囍嘅中式餐館食飯 。嗌咗個二人餐，四百幾蚊 ，包咗一個羊腩煲， 蒜蓉切邊蒸蝦 ，一份時菜，一個生炒糯米飯，仲包埋甜品 ，性價比都好高。雖則為二人套餐，但係個羊腩煲都好大份 ，南乳湯底唔會太鹹，有好香嘅南乳味。 而且有大量嘅羊腩 ，食落唔算好騷， 羊肉煮得好林，點埋腐乳，食完個人暖笠笠。仲有大量嘅枝竹 ，筍， 十分補身 。蒜蓉蒸蝦有大量蒜蓉鋪喺面，十分惹味。生炒糯米飯相對地飯粒煮得比較黏身， 但係味道都唔錯 。另外我哋仲買咗一啲配料 ，包括午餐肉$36， 數一數有成十六塊咁多，真係食唔曬。仲有響玲$36，浸幾浸，索曬啲南乳湯底，yummy另外手切雪花肥牛$188(小)，賣相已經十分奪目，脂肪比例好均勻 ，擺落鍋度十秒15秒就已經食得 ，肉質鮮嫩， 入口即溶，牛味豐富 ，值得推介 。最後仲送埋紫薯糖水， 糖水深紫色顏色十分漂亮，食埋就真係十分滿足了。餐廳每位收茶介六蚊雞。今日就講到咁多，下回再同大家分享美食。