順興茶餐廳

Open Now

Now Closed

午飯時間路經大坑，有好多食肆，疫情下大部份都無需等位，但見順興有一條小人龍，咁我咪上網睇吓順興有咩好食，原來係主打滑蛋飯，食評幾好，所以我哋又去排隊，我哋等咗10分鐘就可以入座。我哋叫咗順興嘅特別推介：招牌滑蛋三寳飯（蝦、牛肉、叉燒）$66，滑蛋豬扒飯$55。兩碟滑蛋飯賣相都幾靚，滑蛋有少許蛋汁，但我食落口覺得唔夠滑溜，亦無流心效果，無蛋汁流出來撈飯，但每碟飯都跟咗一小杯豉油，豉油不會過鹹，帶少許甜味，撈飯食一流。豬扒煎得唔夠香脆，醃得唔夠入味。蝦、牛肉同叉燒真係好普通，無乜味道。如果缺少咗滑蛋同豉油，佢哋只不過係一碟普通碟頭飯。間中食吓都無所謂，但如果要排長龍等位，我就唔會排。