家賀屋刺身寿司專門店

喺灣仔想食日本嘢嘅選擇唔多，所以就試試呢間樓上日式餐廳。雖然地方唔算好大，但menu內嘅選擇好多，刺身、壽司、炸物、燒物樣樣有齊！我哋叫咗幾款壽司，三文魚、油甘魚、火炙左口魚、芥末八爪魚，海膽墨魚試試佢。魚生同飯嘅分配得好好，舊飯唔會大過魚生，而且鮮味十足！呢間餐廳有好多款自家製嘅卷物，所以叫咗個青龍（炸蝦卷）。擺盤擺得好靚呀，而且內裡嘅炸蝦仲新鮮滾熱辣，十分香口！另外，叫咗特選鮪盛（$238），滿足下想去日本食拖羅嘅渴求！當中有3款吞拿魚，普通、中魚腩、大魚腩，3款嘅油脂都足夠，直情可以媲美日本魚市場嘅味道。除咗壽司之外，我哋仲揀咗西京燒三文魚鮫（$65)，表面燒得啱啱好，入面啱啱好熟，魚肉腍身有汁。而且味噌嘅味道唔係死鹹，反而做到提鮮嘅效果!食得咁開心，而且見到有夏日限定嘅啤酒，當然要啤啤佢啦！溫馨提示呢度有2款限定啤酒，冰啤同生啤，如果想啲泡有沙冰嘅感覺，可以一試冰啤，有涼透心嘅感覺！