漁品酸菜魚火鍋放題 (Closed)

老公上星期同朋友去食2人餐，佢話都唔錯，見人食任食，望落去都唔差，所以同奶奶補祝母親節就黎呢度食！頭盤小食有創意架，特別鍾意個梅子浸苦瓜，苦瓜一D都唔苦之餘，重酸酸甜甜好醒胃，蝦多士也不錯，上面加左黑松露醬和沙律醬！頭盤有4款都係可以任叫的！刺身就只有一盤，有生蠔，海膽，圓粒帶子，油甘魚，北寄背和蝦，都新鮮，好明顯唔算係超急凍啤水就俾你食，所以刺身算ok!跟著上酸菜魚同爆醬雞，先講酸菜魚，魚質可能唔係我鍾意食的質感吧，有點怪😅但個湯底真係正，重有水晶粉係底，同埋本身以為係豆卜既野竟然係魚腐，要加分啦！講下個雞，又係不得了，好好味，唔會好辣，又唔會炒得好老，唔錯！到打邊爐喇，有兩個湯底揀，我地揀咗胡椒豬肚湯，裡面堅有豬肚，重有超淋豬粉腸，豬粉腸（個人覺得係驚喜野）湯底味濃，基本上唔需要額外點豉油，牛肉和豚肉都係合格水平以上，有80分，起碼唔係任食就是但俾你果D, 墨魚滑和蝦滑，大愛，夠爽又好味，總括來講性價比比較高，$275/個，無分時段，就係食2個鐘，真心抵食！