花貝日本料理 (Closed)

前幾日同朋友去CWB搵飯食，咁岩去呢頭又想食日本野，所以就試試呢間。胡麻醬燒黑豚肉沙律 – 喺熱辣辣嘅天氣食清新沙律真係享受，呢個沙律好足料，黑豚肉份量都好多，沙律菜脆口新鮮，小蕃茄酸酸甜甜好開胃。燒物三味分別係 – 鱈魚乾、燒沙甸魚笛干同埋味醂河豚魚干，噢！如果配埋冰凍啤酒真係人間享受。（上）雜錦刺身拼盤 – 總共有9款刺身，每款都新鮮，特別一提係赤貝同吞拿魚腩，肥美之餘味道香濃，唔錯唔錯。黑椒燒赤雞 – 看似平平無奇，但係真係好好食🤩🤩，4個字「皮脆肉嫩」。講緊雞胸位都做到嫩滑唔係湯渣質感，果然每樣野都不可以貌相。米牛壽喜燒 – 上枱時我同朋友都嘩一聲，好！足！料！喎！米牛都重牛味但無和牛咁膩，其餘配料都係壽喜燒嘅好朋友，吸曬湯底精華，食完好滿足好飽。飯後仲有甜品 – 焦糖燉蛋、楊枝甘露同水果，我覺得食嘅次序應該係楊枝甘露，然後焦糖燉蛋，咁樣就可以完美發揮到兩種甜品嘅味道喇😀呢一餐我同朋友都滿足，加上餐廳環境幾好，座位之間距離充足，都係聚會嘅好地方。❤️