鬼滷 (Closed)

今時今日去銅鑼灣食打冷都可以‘潮’得起，這間餐廳裝修比較新派，有好多擺設，完全係‘潮’食潮州菜，適合後生仔，睇住個好開揚嘅夜景，聽住有節拍嘅音樂食滷味，都係第一次體驗。餐廳前菜，有個爆谷俾你，幾有趣！朋友想食些菜，所以叫咗個八爪魚沙律，味道好西式甜酸汁，八爪魚嘅份量好多。每台必叫鹵味拼盤可以拼三款至五款，$238同$298嘅分別。鵝片上枱份量都幾多，鵝肉處理得幾嫩滑，入口有滷水陳香，呢度嘅滷水唔算太鹹，覺得唔夠鹹，叫了侍應俾些魚露或醋汁提味。豬仔髀共有三隻，份量非常之大，食物是分開滷水處理，所以豬仔髀一咬，髀肉即刻可以撕開，味道唔會死鹹。鵝腸值得一讚，肥膏都已經處理掉，所以剩返爽脆嘅外皮，入口一啲都唔韌。豬腩肉睇落好邪惡，但入口爽脆，切得夠薄身，所以夠入味。豬肚入口爽脆，夠彈牙。再叫咗個蠔仔粥$108，蠔仔非常之飽滿，粒粒都係脹卜卜，非常鮮味，旁邊嘅配菜芫荽蔥及冬菜，鮮味十足，分量啱啱好。