九記牛腩

Open Now

Now Closed

一碗麵嘅時間，聽足幾個是非，當住客人面嘲笑其他客人，你就知道e班老嘢唔係態度差咁簡單，係人品問題。推薦人地食淨腩，一睇個價錢即刻走，e句嘢個收銀阿姐講咗三次，前前後後嘅意思係話人食唔起唔識食，有個阿叔話而家大把地方有得食，佢就再講埋大埔油麻地邊間邊間，難食到咩咁😒總之九記係牛腩嘅唯一標準，只有佢好食，無所謂口味嘅嘢，唔啱你就係你唔識食嘅果種驕傲，well 好嘅，人生有碗牛腩俾你驕傲下。熟客咪好態度囉，見我生面口又後生，個光頭侍應企係檯邊全程望住我食！見我落醋，陰陽怪氣話果枝醋黎㗎...鬼唔知係醋咩，我都唔想咖哩麵落醋，你啲鹼水味重到咖哩都冚唔住嗱曬鼻，逼我落醋，仲以為搵到位寸人。食物上公平講佢，咖哩牛腩好似地拖咁爛溶溶，麵鹼水味太濃，提一下，今日濕度60幾乾燥晴天，無必要落重鹼水。朋友碗清湯腩，佢好欣賞個湯，不停話好飲，牛腩淋得黎都成型無溶溶爛爛，不過麵佢唔鍾意，可惜無河粉。口味嘅嘢百人百味，對我來說，屋企長輩整嘅清湯腩都好好味，無嘢吸引我再去，除咗去觀察班停留係80年代大富豪夜總會思維嘅夥計。