香港超級餐廳 (Closed)

呢日夜晚同朋友喺金鐘整完啲嘢都成9點半🕥，好多餐廳都已經關門或last order咗。行行下去到譚臣道發現仲有餐廳開喎，即刻入去坐低，食完先發現原來呢條街勁多嘢食，呢間係第一間見到所以入咗去哈哈。夜媽媽竟然好好胃口想食肉，叫咗久違嘅鐵板雜扒餐🥩($53)，要咗燒汁，渣渣聲真係好正🤩。雖然啲肉就唔係咩嘢靚肉，肉味唔濃郁，但個量真係超多，豬🐖牛🐂雞🐓煙肉🥓腸仔樣樣都有，配埋薯條🍟真係勁飽勁滿足。鐵板除咗舊式扒房外，都唔係好多餐廳有，咁嘅價錢抵食啦仲包嘢飲👍🏻。我朋友就要咗黑椒牛柳絲炒烏冬($50)，份量正常，幾夠鑊氣👍🏻，有用唔少牛肉同紅綠椒炒。仲估唔到佢個黑椒味都幾勁下，要飲凍飲解辣🥵。總括嚟講，佢係一間普通嘅茶餐廳😂，有好典型好一般嘅環境，不過食物質素都幾好嘅，份量亦正常。定價喺灣仔商業區嚟講真係唔算貴，性價比唔錯，有機會再經過要醫肚餓都可以入嚟食下。