尚夢・茳煳 (Closed)

喺灣仔嘅譚臣道有間新派嘅中菜餐廳尚夢.茳煳，佢哋入面裝修好有中國嘅特色之餘，又唔似外面嗰啲極為老土裝修，而呢度嘅座位夠哂寬敞舒適，侍應職員又夠哂熱情，真係有賓至如歸嘅感覺。荔枝凍番茄：荔枝嘅清甜香氣經已撲鼻而來，加埋番茄本嘅清新酸甜，令人食完更加開胃。特色蝦多士：蝦肉用料十足，又夠彈牙，多士炸完都唔會有過多嘅油膩，而最重要係佢表面仲鋪滿白芝麻，令蝦多士嘅香味口感都昇華不少。欖菜欖角上肉排：喺肉排上面除咗鋪左欖菜同欖角之外，佢哋仲搽咗好香甜嘅澳洲蜂蜜，而佢哋仲將肉排拎去烤，令其外皮變得更為香脆，仲可以吸收哂蜂蜜同欖角欖菜嘅精華，使其味道變得更加豐富。客家鴛鴦菜：鴛鴦菜係指白菜同梅菜，梅菜獨特嘅口味同白菜好夾，鑊氣好夠，味道調味得宜，菜嘅口感亦控制得好好。