尚夢・茳煳 (Closed)

上次嚟過灣仔呢間新派精品中菜食午市好滿意，所以再嚟幫襯試下晚市小菜。餐廳上個月先裝修完所以好新淨，環境更雅致，而且座位寬敞坐得舒服，更有部分卡位。餐牌上有好多選擇，前菜、肉類、海鮮、炒粉麵等等都有。首先上菜嘅係燉湯。呢度嘅足料燉湯係必點！款式每日不同，每晚有兩款燉湯供應。是日燉湯係姫松茸螺頭豬𦟌湯，姫松茸嘅香味加埋螺頭嘅鮮甜好好味燉湯用蠟燭烘住保溫，好貼心，慢慢飲都唔驚會凍咗。石榴果乾糖醋咕嚕肉擺盤精美，咕嚕肉表面炸得酥脆，糖醋汁味道酸酸甜甜好開胃，配上味道清新嘅石榴，估唔到咁夾秘製宮廷香烤骨上枱後先切開，可見豬肥瘦相間有層次，但唔似東坡肉用五花腩咁油膩，而且燜得好腍，食落肉質鬆化有少少軟骨位，可以食埋。個汁帶微辣夠晒惹味，送飯一流茳湖炒飯炒得好靚米飯乾爽粒粒分明，有鑊氣得嚟唔會油膩！配料有蟹肉、蛋白、茶瓜、杞子等等好足料。食完仲有甜品送有糯米糍或桂花糕揀。糯米糍口感煙韌，以為係平時常見嘅芝麻或者紅豆餡，點知係鳳梨餡，好似食緊鳳梨酥咁，有驚喜！總括嚟講食物精緻質素高，餐廳環境幾好坐得闊落舒服。下次會同屋企人或者朋友嚟再幫襯。