Video
Read full review
2022-08-08
1741 views
疫情持續，我哋嘅死佬飯局有排都開唔到局，依家就只好約個別死佬有啲小飯局，旺角一向都方便大家，所以，今晚就嚟到「雅蘭中心」嘅「山見」，一嚐「90分鐘火鍋吃到飽」，貪佢一個價，任飲任食，好預算，我哋啲麻甩佬又可以食得盡情。 未入餐廳，門口已有好多打卡位，台鐵、火車站、郵筒……等等，色彩夠搶眼，而且，做得好別緻。 啲郵筒唔喺流，事關餐廳晌每枱客都會俾張名信片大家，填完，放入郵筒，真喺會寄番俾大家，連埋張$80優惠券，等下次幫襯時用，明知都喺啲宣傳手法，但幾有心思，再者，張名信片本身又幾靚仔。 入到餐廳內，先喺見到自取食物區，而用餐區，地方都幾大，裝修摩登，又夠光猛，主要喺啲二人、四人卡位，啲布梳化軟熟好坐。而枱上放好晒餐具，枱中嘅電磁爐，操作簡單，又夠晒火力。先講講佢哋嘅玩法，其實，跟平常大家去食放題涮涮鍋一樣，以晚市而言，共有4款任點任食嘅套餐（$218-$358），當然，越貴就越多食物供選擇。除咗各式各樣嘅肉類、魚滑、海鮮及特色火鍋配料之外，仲有好多台式食物，如台式滷水、料理、炸物、餃子同甜品。不過，用餐時間只有90分鐘，緊記要好好把握時間，同計劃定你哋嘅飲食攻略。想好食咩價位嘅套餐同湯
未入餐廳，門口已有好多打卡位，台鐵、火車站、郵筒……等等，色彩夠搶眼，而且，做得好別緻。
啲郵筒唔喺流，事關餐廳晌每枱客都會俾張名信片大家，填完，放入郵筒，真喺會寄番俾大家，連埋張$80優惠券，等下次幫襯時用，明知都喺啲宣傳手法，但幾有心思，再者，張名信片本身又幾靚仔。
入到餐廳內，先喺見到自取食物區，而用餐區，地方都幾大，裝修摩登，又夠光猛，主要喺啲二人、四人卡位，啲布梳化軟熟好坐。
而枱上放好晒餐具，枱中嘅電磁爐，操作簡單，又夠晒火力。
先講講佢哋嘅玩法，其實，跟平常大家去食放題涮涮鍋一樣，以晚市而言，共有4款任點任食嘅套餐（$218-$358），當然，越貴就越多食物供選擇。除咗各式各樣嘅肉類、魚滑、海鮮及特色火鍋配料之外，仲有好多台式食物，如台式滷水、料理、炸物、餃子同甜品。不過，用餐時間只有90分鐘，緊記要好好把握時間，同計劃定你哋嘅飲食攻略。
想好食咩價位嘅套餐同湯底之後，就可以跟店員落單，之後嘅點餐就以二維碼落單，方便快捷，而整晚嘅落單都無錯漏，亦好快將啲食物送到嚟。我哋就選咗中高價位嘅「殿堂。吃到飽」（$298），因為睇落已包括咗好多款肉類。
另外，出面自取食物區，無論火鍋配料，抑或可以即食嘅食物，都有好多嘢揀，所以，順便又介紹吓。
醬料食火鍋好多人都好注重啲醬料，長長一排各式各樣嘅火鍋醬料：雞蛋、砂糖、蒜蓉、辣椒、腐乳、芫茜、蔥花、蠔油、沙茶醬、醋、辣椒油、麻油、醬油……等等，一定混出心水好醬。小弟就唔喜歡太雜，蒜蓉、芫茜、蔥花、麻油、醬油5樣就夠晒！
台式小食自取區就擺放咗啲炸香芋泥丸、地瓜薯條、炸油條，趁湯底仲需要少少時間滾起，我哋都拎咗少少嚟試，過過口癮，啲芋泥丸幾好食，芋泥好綿好粉，地瓜薯條甘香脆口。
炸香芋泥丸、地瓜薯條
4 views
0 likes
0 comments
台式滷水另一邊枱，就有好幾款台式滷水嘢：滷肉、牛筋、牛肚、豬手、甜不辣、豆腐同雞蛋，旁邊仲有煲飯，可以俾客人自製滷肉飯，飯我哋就唔食喇，試咗豬手同甜不辣，夠晒入味，又無過鹹嘅弊病。
冷盤小食轉個彎，晌後邊仲有個凍櫃，放咗多好冷盤小食，由於無打算試，所以，當時都無點睇，睇番啲相，大概有4、5款選擇，有興趣嘅朋友就不妨揀1、2款開開胃。
自取火鍋料自取區中其餘嘅，都喺啲嘅火鍋料，主要都喺蔬菜，亦有啲豬皮、墨魚仔之類，以及一啲麵條（都麵條又幾特別喎：紫薯刀削麵、南瓜刀削麵），附近仲有一大煲紫薯芋圓粥，好奇究竟會有幾多人食呢？每款食物都放有名牌，所以，都唔會唔知自己食咗啲乜。
飲品既然喺任食任飲，當然介紹埋飲品區，打橫一大排凍櫃，放滿多款罐裝凍飲，五花八門，梗有幾款啱你飲，而且，更有幾款自家製冷泡茶：白桃烏龍、桂花烏龍，都喺值得一試；估唔到，更備有啡茶。
以下呢3款喺小弟心水推介嘅飲品，鳳梨汁夠清甜，不含防腐，不含人工色素，飲落又確喺幾夠天然；柑橘汽水則酸香清爽，襯啲肉類就再夾；白桃烏龍嘅烏龍茶底幾幽香，滲出陣陣白桃清香，實在唔錯。
鳳梨汁、柑橘汽水、白桃烏龍
14 views
0 likes
0 comments
講番涮涮鍋，湯底共有7款，需留意，其中4款需要加錢，而我哋揀咗鳳梨蕃茄湯、椰子雪耳湯，前者有鳳梨元素，喺我揀嘅主因，而後者皆因餐牌有多少少介紹，有滋潤補作用。順帶講講服務，除不時有店員幫忙收拾枱面啲吉碟之外，亦好自動嚟幫忙加湯，喺加湯，唔喺加水架。
滿心「肉」望大多數麻甩佬都喺食肉獸，所以，第一水落單就全部都喺肉，所揀嘅套餐所包嘅肉：月見封門柳、卡樂BEEF（牛五花）、牛爽腩（牛胸腹）、嫩肩里肌肉（牛肩胛肉）、羊肉卷、美國穀飼黑毛豬、松阪肉、精選梅花肉、嚴選豚五花、阿公花雕醉雞，一款不漏全部要晒，好似啲壽司碟棟成一大棟，夠晒睇頭。
今次就唔逐樣逐樣評啦，因為對小弟而言都有啲難度，始終得90分鐘，又要影相，又要食，唔可以慢慢嚟，慢慢嚟就食少好多嘢。然而，整體而言，都值回票價，尤其月見封門柳、牛爽腩、嫩肩里肌肉、美國穀飼黑毛豬、梅花肉、豚五花，如果唔一定樣樣都想要試，個人覺得可以集中呢幾款。唯一挑剔位，喺封門柳無咗「月見」囉，要自己去番醬料區加番隻蛋，哈哈！
102 views
0 likes
0 comments
我哋嘅套諶都包咗十幾款海鮮類，不過，我哋就無揀晒，主要揀咗以下8款：福隆沙白、脆肉鯇魚片、陳皮鯪魚滑、松露墨魚滑、花膠、爽滑牛骨髓、鬼馬油炸鬼。咁多樣嘢之中，油炸鬼麻麻哋，其他嘢就隸隸都好食，尤其啲沙白、鯇魚片、魚滑，真喺可以翻點再翻點。
蔬菜拼盤蔬菜分別擺晌3張枱，不過，老友就一次過晌1個區域就砌晒成盆菜返嚟，有娃娃菜、油麥菜、生菜、冬瓜、蟲草花、花生芽、南瓜，好夠食啦，前段食咗咁多肉，搵啲蔬菜嚟平均番吓，志在減低啲罪惡感而已。不過，食落啲蔬菜都頗新鮮，花生芽就第一次食，爽爽哋都幾得意。
甜品時段預晒位食甜品架啦，晌蔬菜枱隔離有個小凍櫃，放有數款雪條，另外，飲品櫃內亦放有牛奶磚、花生磚，都可以自取。小弟就先試咗款「雀巢」嘅雪糕條，唔喺好覺香港有得買，加上包裝袋印上估計泰文啩，泰國直送？都唔理咁多，啱食就得，食完火鍋，食番條雪條寧舍爽。
另外，再落單點咗九份仙草芋圓同十分愛玉芋圓，賣相精美，加上細細碗，啱啱好。小弟就食前者，除有仙草、芋圓，仲有紅豆、花生，仙草好滑溜，芋圓夠煙韌，紅豆又清甜，撈埋一齊入口，非常好食。
九份仙草芋圓、十分愛玉芋圓
5 views
0 likes
0 comments
見之前嘅白桃烏龍唔錯，臨尾坐吓、抖吓，再下一城，加多杯烏龍珍珠奶茶，如果食最貴個餐就免費送，依家加$6都划算啦，因為無欺場，落足料，烏龍做成奶茶一樣夠芳香，啲珍珠又好咬口，飲埋杯嘢，啱啱好連少少虛位都填滿埋。
烏龍珍珠奶茶
39 views
0 likes
0 comments
Post
