火鍋撚 (日富里百好大廈) (Closed)

環境5分：高級台式火鍋店格局，地方大，中國風裝修有屏風同燈籠，位同位之間唔會太迫，前半部全部係長形卡位，可以坐2至6人，後面就有卡位同大枱， 畀大圍人一齊打邊爐，唔嘈，可以畀五分。衛生4分：枱面有煮食餐具同紙巾，一大盤豉油醬料都好乾淨，可以畀四分。服務5分：侍應生非常好人，落單上菜都好快，一路食一路會加湯，快手快腳唔囉唆，又好笑容，態度好好畀滿分。味道5分：1) 香蒜粒炸魚皮，呢碟嘢唔係出面食得到，好明顯廚房即叫即炸，用香蒜粒炒過D魚皮，一上枱熱辣辣，就咁食又嘢味，點湯食都好食。2) 黃金雞皮呢個都係出面未見過嘅，細細粒雞皮用咸蛋處理過，炸到好似薯片咁香脆，一Ｄ都唔油，送啤酒真係好正。3) 媽媽滋補老火湯鍋入面有雞肉，瘦肉，猴頭菇，紅蘿蔔，粟米，海底椰，紅棗，超多樣嘅材料嚟煲，未落食材之前已經飲左兩碗靚湯，然後叫夥記加湯先開始打邊爐，絕對真材實料好夠味。4) 加22蚊就可以有五塊大大塊嘅鴨血，冇騷味，食落軟軟淋淋仲好滑。5)  個巧手韭菜餃應該係自己包嘅，個皮又薄又軟滑，個韭菜餡好香好嘢味。6)  新鮮紫淮山，因為未見過紫色嘅淮山所以叫嚟食下，煮一陣食落口就感覺好多纖維，應該係非常健康