阿來客棧雞煲火鍋 (Closed)

之前都有嚟銅鑼灣打邊爐，每次都會揀一啲特色啲嘅火鍋店，有啲係九宮格，有啲係醬料好多好特別，今次呢間火鍋店有一種古色古香嘅感覺。睇落好似平平無奇嘅邊爐店，個湯底竟然係非常之好味，養顏海底椰子雞湯底好味到一個點可以當湯飲，我竟然係打邊爐之前就已經飲咗兩碗湯，感覺係好滋潤，都好想學返屋企試吓煲啊！呢間嘅湯底入邊本身已經有半隻雞，所以雞肉已經好足夠，唔需要再加太多肉類，所以我揀咗手打四寶丸，非常之精緻，每種都係一兩粒，即包韭菜餃應該真係即刻包，唔係冰鮮嗰種，所以放落去好快浮起就可以食得。見到寫住店舖推薦嘅阿來牛肉卷🫔，原來入面係包住咗芫荽㗎，當牛肉好快就熟，其實真係好香口。蜂巢豆腐吸取咗好多湯汁，所以非常之鮮甜，強烈推薦大家叫蜂巢豆腐！稻庭烏冬因為只係叫咗半份，所以份量唔算太多，但係因為本身個湯底已經有半隻雞，所以都已經夠食。翡翠豆苗同我想像中有少少唔同，原來係呢一種有少少似日式嘅豆苗，放喺湯度整到比較軟林再食都有一番滋味。